အားထုတ်ခြင်းသဘော, ဆိုင်ရာကိစ္စကို ပြုလုပ်ဆောင်ရွက်ဖို့ရာ မကြောက်မရွံ့ရဲဝံ့ခြင်း နောက်မတွန့်ခြင်းသဘောကို "၀ီရိယ" လို့ ခေါ်ပါတယ်၊ ရတဲ့ဆင်းရဲအံကြိတ်ခဲလို အမြဲသည်းခံခြင်းဟာ ၀ီရိယရဲ့ သဘောဖြစ်ပတယ်။
ထကြွလုံ့လ ၀ီရိယရှိသူကသာ ဆိုင်ရာကိစ္စမှာ ရဲရင့်ပါတယ်၊ ဒါ့ကြောင့် ရဲရင့်သူရဲ့ ဖြစ်ကြောင်း(ရဲရင့်ခြင်း, နောက်မတွန့်ခြင်း) ဆိုတာဟာ ၀ီရိယပဲဖြစ်ပါတယ်၊ ၀ီရိယရှိသူကသာ တစ်စုံတစ်ခုကို ပြုလုပ်ရတဲ့အတွက် ရရှိလာမယ့် ဆင်းရဲဒုက္ခကိ မကြောက်မရွံ့ နောက်မတွန့်ဘဲ သည်းခံနိုင်ပါတယ်။
ယှဉ်ဘက်တရားတွေကို ထောက်ပံ့ခြင်းဟာ ၀ီရိယရဲ့ အလုပ်ကိစ္စဖြစ်ပါတယ်၊ လဲပြိုခါနီး အိမ်အိုကြီးကို ထောက်ကျားတိုင်က မလဲမပြိုရအောင်ထောက်ကန်ထားသလို ယှဉ်ဘက်တရားတွေကို ဆိုင်ရာကိစ္စမှာ ရော့ရဲရဲမရှိရအောင် ၀ီရိယက ထောက်ပံ့ထားပါတယ်၊ ဒါ့ကြောင့် ၀ီရိယနှင့် ယှဉ်တဲ့ တရား
တွေက တက်တက်ကြွကြွ ရှိနေကြပါတယ်။
ဝီရိယဟာ ဆုတ်နစ်ခြင်းကင်း ရဲတင်းပါတယ်၊ ထိနမိဒ္ဓပြဌာန်းတဲ့ ကုသိုလ်ဝိတ္တုပ္ပာဒ်ကို ကောသဇ္ဖ (ပျင်းရိခြင်း) လို့ခေါ်ပါတယ်၊ ၀ီရိယက အဲဒီကောသဇ္ဖတရား အပျင်းထူမှုများကို လွှမ်းမိုးကာ အရေးကြုံလာက နောက်မဆုတ်တတ်တဲ့တရား ဖြစ်ပါတယ်။
၁။ တစ်စုံတစ်ခုကို လုပ်ရခါနီးနေခြင်း,
၂။ လုပ်ပြီးခါစဖြစ်ခြင်း,
၃။ ခရီးသွားရခါနီးဖြစ်ခြင်း,
၎။ ခရီးက ရောက်ခါစဖြစ်ခြင်း,
၅။ မစားရသေးခြင်း,
၆။ စားပြီးခါစဖြစ်ခြင်း,
၇။ မကျန်းမမာဖြစ်စေပြုနေခြင်း,
၈။ နာလန်ထစဖြစ်ခြင်း-
ဒီ ၈-ပါးကို ပျင်းရိခြင်းရဲ့အကြောင်း (ကောသဇ္ဖ၀တ္ထု) လို့လဲ ခေါ်ပါတယ်၊ အားထုတ်ခြင်းရဲ့အကြောင်း (၀ီရိယာရမ္ဘ၀တ္ထု) လို့လဲ ခေါ်ပါတယ်၊ ဒီဝတ္ထု ၈-ခုကပဲ ပုဂ္ဂိုလ်တွေရဲ့ ဓာတ်ခံအလို အဇ္ဈာသယကို လိုက်ပြီး ပျင်းရိခြင်းရဲ့ အကြောင်းလဲ ဖြစ်လာရပါတယ်၊ အားထုတ်ခြင်းရဲ့ အကြောင်းလဲ ဖြစ်လာရပါတယ်၊
ဒီ ၈-ပါးကို အကြောင်းပြုပြီး အပျင်းဓာတ်ခံ ရှိနေသူက-
၁။ ငါ့မှာ လုပ်စရာကိစ္စ ရှိနေတယ်၊ အလုပ်လုပ်တော့ ပင်ပန်းရတော့မယ်၊ ကြိုတင်လို့ အိပ်ထားလိုက်ဦးမှပဲ-လို့ လုပ်ရမယ့်အလုပ်ကို ဆင်ခြင်ကာတစ်ဝကြီး အိပ်ပစ်လိုက်ပါတော့တယ်။
၂။ ငါ့က အလုပ်လုပ်နေခဲ့ရတယ်၊ ဒါနဲ့ ကိုယ်ခန္ဓာ ပင်ပန်းလာတယ်၊ အနားယူပြီး အိပ်ပစ်လိုက်ဦးမှပဲ-လို့ လုပ်ပြီးအလုပ်ကို ယိုးမယ်ဖွဲ့ကာတစ်ဝကြီး အိပ်ပစ်လိုက်ပါတော့တယ်။
၃။ ငါ့မှာ ခရီးသွားစရာ ရှိနေတယ်၊ ခရီးသွားတော့ ပင်ပန်းဦးမှာပဲ၊ အခုနေက ကြိုတင်အိပ်ထားရတော့မယ်လို့ ခရီးသွားရမယ့်ကိစ္စကို ဆင်ခြင်ကာတစ်ဝကြီး အိပ်ပစ်လိုက်ပါတော့တယ်။
၎။ ငါဟာ ခရီးက ပြန်ရောက်ခါစ ဖြစ်နေတယ်၊ ခရီးသွားနေတုန်းက ပင်ပန်းလာခဲ့တယ်၊ အိပ်စက်လိုက်ဦးမှပဲလို့ ခရီးသွားနေခဲ့ရတာကို ဆင်ခြင်ကာ အိပ်နေပါတော့တယ်။
၅။ ငါဟာ မစားရသေးဘူး၊ ဆာနေသေးတယ်၊ အလုပ်လုပ်ဖို့ မတော်သေးဘူး၊ အိပ်ဦးမှပဲလို့ မစားရသေးတာကို ယိုးမယ်ဖွဲ့ကာ အိပ်နေပါတော့တယ်။
၆။ ငါဟာ စားပြီးခါစဖြစ်နေတယ်၊ ဗိုက်လေးနေတယ်၊ အလုပ်လုပ်ဖို့ မတော်သေးဘူး၊ အိပ်ဦးမှပဲလို့ အစာစားပြီးတာကို ယိုးမယ်ဖွဲ့ကာအိပ်နေပါတော့တယ်။
၇။ ယခု ငါ မကျန်းမမာ ဖြစ်စပြုနေတယ်၊ မအီမသာ ဖြစ်နေတယ်၊ အိပ်မှတော်မယ်၊ အိပ်ဦးမှပဲလို့ မအီမသာဖြစ်နေတာကို ယိုးမယ်ဖွဲ့ကာအိပ်နေပါတော့တယ်။
၈။ ငါဟာ နာလန်ထစ ဖြစ်တယ်၊ အနာရောဂါ ပျောက်ခါစ ရှိသေးတယ်၊ အားမရှိသေးဘူး၊ အလုပ်လုပ်လို့ မကောင်းသေးဘူး၊ အနားယူဦးမှပဲလို့ဖြစ်ခဲ့တဲ့ အနာရောဂါကို ယိုးမယ်ဖွဲ့ကာ အိပ်နေပါတော့တယ်။
အပျင်းဓာတ်ခံရှိနေလို့ အယောနိသော မနသိကာရရှိသူက ဒီလိုပဲ အချိန်ကို ကုန်လွန်စေပါတော့တယ်၊ မရရှိသေးတဲ့ ပစ္စည်းဥစ္စာ အတတ်ပညာကိုလဲ ရရှိအောင်, ရပြီးတဲ့ ပစ္စည်းဥစ္စာ အတတ်ပညာကိုလဲ တိုးပွားအောင် အားမထုတ်တော့ပါ၊ ဒါနဲ့ သူများအောက်ကို ရောက်မှန်းမသိဘဲ တဖြည်းဖြည်း ရောက်နေရပါတော့တယ်။
ဝီရိယဓာတ်ခံ ရှိနေသူက ဒီ ၈-ပါးကိုပဲ အကြောင်းပြုပြီး-
၁။ ငါ့မှာ လုပ်စရာကိစ္စတစ်စုံတစ်ခု ဖြစ်ပေါ်လာစရာ ရှိနေတယ်၊ အဲဒီအချိန် ယခုနှယ်က ကြိုတင်အားထုတ်ထားမှ တော်မယ်လို့ ဖြစ်ပေါ်လာမယ့်ကိစ္စကို ဆင်ခြင်ကာ လွန်စွာ အားထုတ်တတ်ပါတယ်။
၂။ ငါက အလုပ်လုပ်နေခဲ့ရတယ်၊ အဲဒီအလုပ်ကို လုပနေတုန်းက လုပ်နေကျ ကြိုးစားလိုက်ဦးမှ တော်မယ်လို့ ပြီးခဲ့တဲ့အလုပ်ကိစ္စကို ဆင်ခြင်ကာလွန်စွာအားထုတ်ပါတယ်။
၃။ ငါ့မှာ ခရီးသွားစရာ ရှိနေတယ်၊ အချိန်ကျလို့ သွားရတဲ့အခါ လုပ်နေကျ အလုပ်တွေကို မလုပ်ဘဲ နေရတော့မယ်၊ ယခုနှယ်က ကြိုတင်အားထုတ်ထားမှ တော်မယ်လို့ ခရီးသွားရမယ့် ကိစ္စကို ဆင်ခြင်ကာ လွန်စွာအားထုတ်ပါတော့တယ်။
၅။ အစာမရှိတော့ ငါ့ရဲ့ ခန္ဓာကိုယ်ဟာ ပေါ့ပါးတယ်၊ အလုပ်လုပ်ရန် သင့်တော်တယ်၊ အားထုတ်ကြိုးစားမှ တော်မယ်လို့ အစာမစားရသေးတာကို ဆင်ခြင်ကာ လွန်စွာအားထုတ်ပါတယ်။
၆။ အခု အစာကို စားလိုက်ရတော့ ငါ့ရဲ့ ကိုယ်က အားရှိလာတယ်၊ အလုပ်လုပ်ရန် သင့်တော်နေတယ်၊ အခုကြိုးစားအားထုတ်လိုက်ဦးမှပဲ-လို့ အစာစားပြီးတာကို ဆင်ခြင်ကာ လွန်စွာအားထုတ်ပါတယ်။
၇။ ယခု ငါမကျန်းမမာ ဖြစ်စပြုနေတယ်၊ မအီမသာ ဖြစ်နေတယ်၊ မအီမသာ ဖြစ်နေတယ်၊ ဒီရောဂါ တိုးပွားလာစရာ ရှိတယ်၊ ယခုနှယ်က ကြိုတင်ပြီး ကြိုးစားအားထုတ်ထားလိုက်ဦးမှပဲ-လို့ စွဲကပ်လာစပြုတဲ့ အနာကို ဆင်ခြင်ကာ လွန်စွာအားထုတ်ပါတော့တယ်။
၈။ ငါဟာ နာလန်ထစ ဖြစ်တယ်၊ ဒီရောဂါဟာ ပြန်ဖြစ်စရာအကြောင်းရှိနေတယ်၊ ရောဂါဖြစ်နေတုန်းမှာလဲ ငါ့ရဲ့ လုပ်နေကျအလုပ်တွေဟာလစ်ဟင်းနေခဲ့တယ်။ နောင်လဲ လစ်ဟင်းစရာ ရှိနေပြန်တယ်၊ အခုနှယ်က ကြိုတင်ပြီး ကြိုးစားအားထုတ်လိုက်ဦးမှာပဲလို့ ဖြစ်ခဲ့တဲ့ ရောဂါကို ဆင်ခြင်ကာ လွန်စွာအားထုတ်ပါတယ်။
ဝီရိယ ဓာတ်ခံရှိတဲ့အပြင် အများအားဖြင့် ယောနိသော မနသိကာရ ရှိသူက အချိန်ကို အချိုးတကျ အသုံးချတတ်ပါတယ်၊ မရသေးတဲ့ ပစ္စည်းဥစ္စာ အတတ်ပညာကို ရရှိအောင်, ရရှိပြီးတဲ့ ပစ္စည်းဥစ္စာ အတတ်ပညာကို တိုးပွားအောင် ကြိုးစားအားထုတ်နေပါတော့တယ်၊ ဒါနဲ့ သူမျာတွေရဲ့ အထက်ကိုရောက်နေရပါတော့တယ်။
ဒါ့ကြောင့်----ဘုရားရှင်နှင့် ရှေးမထေရ်များ, အဌကထာဆရာများကလဲ-
ပေါ့တန်ပျင်းရိ လုံ့လမရှိသူရဲ့ နှစ်ပေါင်းတစ်ရာ အသက်ရှင်နေရတာထက် ခိုင်မြဲဇွဲထူ အားထုတ်နေသူရဲ့ တစ်နေ့တစ်ရက် တစ်နံနက်မျှ အသက်ရှင်ရခြင်းက မြတ်ပါတယ်။
အေးလွန်းတယ်, ပူလွန်းတယ်, သိပ်မိုးချုပ်သွားပြီ, သိပ်စောသေးတယ်-လို့ ၀ီရိယလျော့ကာ လုပ်ငန်းကိစ္စကို စွန့်လွှတ်ထားတဲ့ သတ္တ၀ါတွေကိုအခွင့်အခါကောင်းတွေက ကျော်လွန်သွားကြပါတယ်။
အအေးကိုပဲဖြစ်ဖြစ်, အပူကိုပဲဖြစ်ဖြစ် ခြေဖ၀ါးအောက်က မြက်မှိုက်ကိုလို အောက်မေ့မှတ်ထင်ပြီး လုံ့လရှိတဲ့ ယောက်ျား(မိန်းမ)တွေက ပြုလုပ်ရမယ့်ကိုယ်ကျိုးစီးပွား, သူကျိုးစီးပွားတွေကို ပြုလုပ်လို့ရှိရင် ချမ်းသာသုခက မယုတ်လျော့နိုင်ပါ။
ကိုယ်တွေ့မျက်မြင်ဖြစ်တဲ့ လောကီလုပငန်းများကိုသော်မှ ယုတ်ညံ့တဲ့ ၀ီရိယရှိတဲ့ ပုဂ္ဂိုလ်က လုက်မိဖို့ရန် မစွမးဆောင်နိုင်ပါ၊ မနှိုင်းယှဉ် မရေတွက်နိုင်အောင် အပင်ပန်းခံကာ အားထုတ်လုံ့လ ၀ီရိယရှိတဲ့ ပုဂ္ဂိုလ်က ရခဲတဲ့အရာဆိုတာ မရှိနိုင်ပါဘူး။
ဒီလို ဟောတော်မူ, မိန့်တော်မူကြပါတယ်။
ဆိုခဲ့ပြီးသည်အားလျော်စွာ တို့တစ်တွေကလဲ တကယ်လုပ်စရာကိစ္စနှင့် ရင်ဆိုင်တွေ့ကြုံလာတဲ့အခါ " အခြားလုပ်စရာ အလုပ်ရှိနေသေးတယ်, အခုမှ လုပ်ပြီးခါစ ရှိသေးတယ်, ခရီးသွားစရာ ရှိသေးတယ်, ခရီးသွားနေတာက အခုမှပြန်ရောက်လာတယ်, မစားရသေးလို့ ဗိုက်ဆာနေတယ်, စားပြီးခါစမို့
ဗိုက်လေးနေတယ်, နှာစေးနေတယ်, နေကောင်းခါစ ရှိသေးတယ်, အေးလွန်းသေးတယ်, ပူလွန်းလှတယ်, စောသေးတယ်, နေမြင့်လှပြီ" စသည်ဖြင့် ယိုးမယ်ဖွဲ့ကာ လုပ်ရမယ့်အလုပကို ရှောင်တိမ်းမနေသင့်ပါ၊ တကယ့်ကိစ္စ ကြုံလာရင် အအေး-အပူမျှကိုသာမက အသက်ကိုပင် ထီမထင်ဘဲ ရင်ဆိုင်တွေ့ရသမျှကို ရဲရဲတင်းတင်း အားရပါးရ လုပ်ကိုင်သင့်ကြပါတယ်၊ ဒီလို လုပ်ကိုင်ကြမှသာ အဖက်ဖက်က တိုးတက်လာမှာ ဖြစ်ပါတယ်။
သက်သေသာဓက အနေနဲ့ ပြောရမယ်ဆိုရင် တိုင်းပြည်တစ်ပြည် အနေနဲ့ပဲ ကြည့်ကြည့်, မိမိတို့ တတ်သိထားတဲ့ အတတ်ပညာ အသိပညာတွေကို အသုံးချကာတွေ့သမျှ အလုပကို ရဲရဲတင်းတင်း အားရပါးရ အစွမ်းကုန် ကြိုးစားအားထုတ်လာကြတဲ့ တိုင်းပြည်တွေ, လူမျိုးစုတွေနှင့် ပုဂ္ဂိုလ်တွေကသာ အထက်တန်းသို့ ရောက်နေကြတာကို တွေ့ကြရမှာ ဖြစ်ပါတယ်၊ မြန်မာနိုင်ငံနှင့် ဘ၀တူဖြစ်ခဲ့ကြတဲ့ အရှေ့ဘက် အိမ်နီးချင်း နိုင်ငံတွေကို လှမ်းမျှော်ကြည့်ရုံနဲ့ပဲသိသာလှပါတယ်၊ ထင်ရှားလှပါတယ်။
တို့နိုင်ငံသူ နိုင်ငံသားတွေအတွက် ယခုအချိန်ဟာ မိမိတို့ရဲ့ အသိပညာ အတတ်ပညာတွေကို ဘက်စုံအသုံးချကာ တွေ့သမျှ အလုပ်ကို ရဲရဲတင်းတင်းအားရပါးရ အစွမ်းကုန် ကြိုးစားအားထုတ်ကြရမယ့်အချိန် ဖြစ်ပါတယ်၊ အချိန်မနှောင်းလှသေးပါ၊ တကယ်သာ ကြိုးစားအားထုတ်ကြပါရင် သူတို့ကို မီနိုင်ရုံမျှမက ကျော်လွန်လို့ပင် သွားနိုင်စရာရှိပါတယ်။
ဒါ့ကြောင့် သက်ဆိုင်ရာ အလုပ်မှန်သမျှကို ကျားမ-မဟူ ရှင်လူမကြွင်း ရဲရဲတင်းတင်း အားရပါးရ အစွမ်းကုန် ကြိုးစားအားထုတ်ကြပါစို့။
[ဗုဒ္ဓအလိုတော်ကျ ကြီးပွားချမ်းသာရေး ကိုယ်ကျင့်မင်္ဂလာ၊ မြောင်းမြပဇ္ဇောတာရုံနှင့် မှော်ဘီ သာသနာ့ဝန်ဆောင်ဆရာတော် အရှင်ကုမာရ] စာအုပ်မှ ကူးယူဖော်ပြသည်။
No comments:
Post a Comment