မကြောက်လန့်ခြင်း သဘောကိုလဲ "အနောတ္တပ္ပ" လို့ခေါ်ပါတယ်၊ အနောတ္တပ္ပဟာ မကောင်းမှုကို မကြောက်မရွ့ခြင်း, မထိတ်လန့်ခြင်းသဘော ရှိပါတယ်၊ မကောင်းမှုကို ပြုလုပ်သူတို့ မလွှဲသာ မရှောင်သာ တွေ့ရတတ်တဲ့ ဘေးကြီး ၄-ပါးကို ပြောပြပါဦးမယ်။
၁။ အတ္တာနုဝါဒအား = [အတ္တ - ကိုယ့်ကိုကိုယ် + အနုဝါဒ - စွပ်စွဲခြင်း၊ ] မကောင်းမှုကို ပြုလုပ်မိလို့ရှိရင် "သူများတကာက ငါ့ကို လူကြီးလူကောင်း, သူတော်ကောင်းလို့ အသိအမှတ်ပြုနေကြတယ်၊ ဒါပေမယ့် ငါ့အကြောင်းကိုတော့ ငါကသာ အသိဆုံးဖြစ်ပါတယ်၊ ငါက သူတို့ထင်သလို တကယ့်သူတော်ကောင်းအစစ် မဟုတ်ပါဘူး၊ မကောင်းမှု ဒုစရိုက်တွေကို ခိုးကြောင်ခိုးဝှက် ပြုလုပ်နေတဲ့ အယောင်ဆောင် ကြောင်သူတော် တစ်ယောက်မျှသာ ဖြစ်ပါတော့တယ်" လို့ ကိုယ့်ကိုကိုယ် ပြန်လို့ စွပ်စွဲခြင်း, ကိုယ့်ကိုကိုယ် မကြည်ညိုနိုင်ခြင်းဘူး။
၂။ ပရာနုဝါဒဘေး = [ ပရ - သူတစ်ပါးတို့က + အနုဝါဒ - စွပ်စွဲခြင်း၊ ] ဒီလူဟာ အကုသိုလ် ဒုစရိုက်တွေကို ပြုလုပ်နေတဲ့ လူယုတ်မာ တစ်ယောက်ပဲလို့ သူတစ်ပါးတို့ရဲ့ စွပ်စွဲကဲ့ရဲ့ခံရခြင်း, အထင်သေး အမြင်သေးခံရခြင်းဘေး။
၃။ ဒဏ္ဍဘေး = အကုသိုလ် ဒုစရိုက်တွေကို ပြုလုပ်မိခဲ့ပါရင် ယခုဘ၀မှာပဲ သူ့ကိုသတ်မိလို့ ကိုယ်လဲသေစားသေရခြင်း, သူ့ဥစ္စာကို ခိုးမိလို့ အရိုက်အနှက် ခံရခြင်း, ထောင်ဒဏ်အပြစ်ပေးခံရခြင်း, သူတစ်ပါးရဲ့ ဇနီးတွေ သမီးပျိုတွေကို ပြစ်မှားကျူးလွန်မိလို့ အရိုက်အနှက်ခံရခြင်း, ငွေဒဏ်တပ်မှု ထောင်ဒဏ်ပေးမှုကို ခံရခြင်း - စတဲ့ ဒုက္ခဘေးရန် အပြစ်ဒဏ် အမျိုးမျိုးကို ခံရခြင်းဘေး။
၎။ ဒုဂ္ဂတိဘေး = မကောင်းမှု အကုသိုလ်ဒုစရိုက်ကို ပြုမိတဲ့အတွက် သေခါနီးကျမှ အကြီးအကျယ် နောင်တရလို့ နောင်ဘ၀မှာ ကြုံတွေ့ရမယ့် အပါယ် ၄-ပါးဆိုတဲ့ မကောင်းသော ဂတိသို့ ရောက်ရမယ့်ဘေး။
အကုသိုလ် ဒုစရိုက်ကို ပြုထားမိရင် လူပါးလူနပ်ဖြစ်လို့ ရှေ့ဘေးကြီး ၃-ပါးက လွတ်နိုင်မယ့် နော်င်ဘ၀သံသရာအရေး ဒုဂ္ဂတိဘေးက လွတ်ကင်းအောင် ရှောင်တိမ်းရန်တော့ ခဲယဉ်းလှပါတယ်၊ ဒါ့ကြောင့် မကောင်းမှု အကုသိုလ် ဒုစရိုက်မှန်က တကယ်ပဲ ထိတ်လန့်ကြောက်ရွံ့ဖွယ်ကောင်းလှပါတယ်၊ ဒါပေမယ့် မီးတောက် မီးလျှံကိ ပိုးဖလံကောင်လေးတွေက (ရွှေတောင်ကြီးထင်လေရော့သလားမသိ) အတင်းတိုးဝှေ့ကြသလို အနောတ္တပ္ပကိန်ူသူတွေကလဲ ကြောက်ရွံ့စရာ မကောင်းမှု အကုသိုလ် ဒုစရိုက်တွေကို မကြောက်မရွံ့ဘဲ ရဲရဲကြီး ပြုနေကြပါတော့တယ်။
ဒီနေရာမှာလဲ ဟရိတစရသေ့ရဲ့ အကြောင်းကိုပဲ ပြန်လည်သုံးသပ်ကြည့်စေလိုပါတယ်၊ ဟရိတစရှင်ရသေ့မှာ-ကိုယ့်ကိုကိုယ် မကြည်ညိုနိုင်စရာ အတ္တာနုဝါဒဘေး, ရှင်ဘုရင်ရဲ့ ဆရာဖြစ်တဲ့ ရှင်ရသေ့က မိဖုရားနှင့် ဖော်ကပြားယွင်းမှားနေသတဲ့လို့ တစ်မြို့လုံး ပျံ့နှံ့ပြောဆိုနေကြတဲ့ ပရာနုဝါဒဘေး-
ဒီဘေး ၂-ခုက လကင်င်းဒိဌ တွေ့ကြုံနေရတဲ့ ဘေးတွေဖြစ်ကြပါတယ်၊ ဒါပေမယ့် မရှောင်နိုင်တော့ဘဲ နေ့စဉ်ရက်ဆက် ပြုလုပ်နေပါတော့တယ်၊ ဒါ့အပြင် ရှင်ဘုရင်က ပါရမီဖြည့်ဘက် သူတော်ကောင်းကြီးဖြစ်လို့သာ တော်ပါသေးတယ်၊ သာမန်ရှင်ဘုရင်မျိုးသာ ဖြစ်ခဲ့ပါရင် မိမိရဲ့ ကြင်ရာတော် မိဖုရားကို ပြစ်မှားလွန်ကျူးတဲ့အတွက် ရှင်ရသေ့ရဲ့ အသက်ဘေးမှာ တွေးဝံ့စရာပင် မရှိတော့ပါ၊ ဒီမျှလောက် သေဘေးနှင့် နီးကပ်နေတဲ့ အမှုကြီးကို အနောတ္တပ္ပ၀င်လာတဲ့အတွက် ဘာကိုမှ ထီမထင်တော့ဘဲ ရဲရဲကြီး ပြုဝံ့ပါတော့တယ်၊ ဒီအနောတ္တပ္ပနှင့် အတူဖြစ်တဲ့စိတ်ကို အနောတ္တပ္ပစိတ်-လို့ ခေါ်ပါတယ်။
[ဗုဒ္ဓအလိုတော်ကျ ကြီးပွားချမ်းသာရေး ကိုယ်ကျင့်မင်္ဂလာ၊ မြောင်းမြပဇ္ဇောတာရုံနှင့် မှော်ဘီ သာသနာ့ဝန်ဆောင်ဆရာတော် အရှင်ကုမာရ] စာအုပ်မှ ကူးယူဖော်ပြသည်။
No comments:
Post a Comment