အာရုံတစ်ခုခုကို ပြုလိုခြင်း(ရယုလိုခြင်း) ကို "ဆန္ဒ" လို့ခေါ်ပါတယ်၊ အာရုံပြုလိုခြင်းဟာ ဆန္ဒရဲ့သဘော (လက္ခဏာ) ဖြစ်ပါတယ်၊ မြင်လိုမှု, ကြားလိုမှု, နမ်းလိုမှု, အရသာခံစားလိုမှု, ထိလိုမှု, သိလိုမှုဆိုတဲ့ အာရုံ ၆-ပါးကို အာရုံပြုလိုမှုဟာ ဆန္ဒရဲ့သဘော (လက္ခဏာ)ဖြစ်တယ်လို့ ဆိုလိုပါတယ်။
အလိုရှိရင် ရှာမှီးရမြဲ ဖြစ်တဲ့အတွက် လိုလားအပ်တဲ့ အာရုံကို ရှာမှိးခြင်းဟာ ဆန္ဒရဲ့ အလုပ်ကိစ္စဖြစ်ပါတယ်၊ လောကမှာ လိုချင်မက်မောစရာကောင်းတဲ့ (လောဘနေယျ) အာရုံ ကာမဂုဏ်ကို ရှာမှီးမှုမှတစ်ပါး တရားရှာမှု, ပညာရှာမှု, နိဗ္ဗာန်ကိုလိုလားတောင်တမှုတွေဟာ ဆန္ဒရဲ့ သဘောကိစ္စတွေချည်း ဖြစ်ပါတယ်၊ လိုချင်မက်မောစရာကောင်းတဲ့ (လောဘနေယျ) အာရုံ ကာမဂုဏ်ကို အလိုရှိရာမှာတော့ လောဘပြဌာန်းတဲ့အတွက် လောဘသဘောသို့ ဆန္ဒကလိုက်ပါရပါတယ်။
လောဘနေယျအာရုံပင် ဖြစ်စေဦးတော့-သူတစ်ပါးအား လှူဒါန်းလို, ချီးမြှောက်ပေးကမ်းလိုလို့ ပစ္စည်းဥစာကို ရှာဖွေသိမ်းဆည်းရာမှာ ငြိကပ်တွယ်တာ တဏှာသဘော မပါသူတို့အတွက်မှာ လောဘကသဘော မဟုတ်၊ ဆန္ဒသဘော ဖြစ်ပါတယ်၊ မြားပုံကြီးကို အနားမှာထားလို့ ပစ်လိုက်တဲ့ လေးသမား မြားတွေကို ကောက်ကာကောက်ကာ ယူပေမယ့် အဲဒီမြားတွေအပေါ်မှာ ငြိကပ်တွယ်တာမှုသဘော မပါသလိုဘဲဖြစ်ပါတယ်။
ဒီဆန္ဒသဘောဟာ သတ္တ၀ါတွေရဲ့ သန္တာန်မှာ အလွန်ထင်ရှားပါတယ်၊ ဘုရားကို သွားချင်တာ, ကျောင်းကိုသွားချင်တာ, ဥပုသ်စောင့်ချင်တာ, တရားနာချင်တာ, တရားထိုင်ချင်တာ, သူတစပါးအကျိုး ဆောင်ရွက်လိုတာကအစ နိဗ္ဗာန်လိုချင်တာအထိ အကုန်လုံးဟာ ဆန္ဒချည်းဖြစ်ပါတယ်၊
တော်ရုံတန်ရုံ လိုချင်ရာမှာ ဆန္ဒက အားသားပါတယ်၊ မဖြစ်မနေလိုချင်တာ, မရမကလိုချင်ရာတွေမှာတော့ ဆန္ဒကအားကြီးပါတယ်၊ ဒါပေမယ့် ဆန္ဒရှိရုံ, တောင့်တရုံနဲ့တော့ လိုချင်တာကို ရနိုင်မှာ မဟုတ်ပါ၊ လိုချင်တောင့်တသည်အားလျော်စွာ ကြိုးစားအားထုတ်မှု ၀ီရိယပါမှသာ ရနိုင်မှာ ဖြစ်ပါတယ်။
ကမ္ဘာမြေကြီးတစ်ခုလုံးဟာ အင်မတန် ပူပြင်းနေတဲ့ မီးကျီးခဲတွေနဲ့ ပြည့်နှက်နေတယ် ဆိုကြပါစို့၊ အဲဒီလို မီးကျီးခဲတွေနဲ့ ပြည့်နှက်နေတဲ့ကမ္ဘာမြေပြင်ရဲ့ အရှေ့ဘကအစက အနောက်ဘက်အဆုံးအထိ ခြေကျင်ရောက်အောင် သွားနိုင်က ဘုရားဖြစ်မယ်ဆိုရင် မကြောက်မရွံ့ နောက်မတွန့်ဘဲ လျှောက်သွားနိုင်လောက်အောင် အလောင်းတော်တို့ရဲ့ ဘုရားဖြစ်လိုတဲ့ ဆန္ဒက ထက်သန်လှပါတယ်၊ အားကြီးလှပါတယ်၊ အဲဒီလို
ထက်သန်အားကြီးတဲ့ဆန္ဒ အရင်းခံလို့ အားထုတ်လုံ့လ ၀ီရိယသန်သန်နဲ့ ပါရမီတော်တွေကို ဖြည့်လာခဲံတဲ့အတွက် အဆုံးမှာ ဆန္ဒတော်အတိုင်း ဘုရားဖြစ်တော်မူလာရပါတယ်။
အထက်တန်းကို ရောက်ရန် အခြေခံမျှော်မှန်းချက် (ဆန္ဒ)မျှ မရှိပါရင် မည်သူမျှ ထက်ထက်သန်သန် ကြိုးစားအားထုတ်ကြမယ်မဟုတ်ပါ၊ မျှော်မှန်းချက် ရှိသူတွေကသာ ထက်ထက်သန်သန် ကြိုးကြိုးစားစား အားထုတ်ကြပါတယ်၊ သို့ဖြစ်သည်အားလျော်စွာ လူသားတိုင်း လူသားတိုင်းက မျှော်မှန်းချက် (ဆန္ဒ)တစ်ခုခုကို ထားသင့်ပါတယ်၊ အဲဒီဆန္ဒကို အာသာ-(လိုလားတောင့်တမှု)လို့လဲ ခေါ်ပါတယ်၊ ဒါပေမယ့် အဲဒီလို အာသာဆန္ဒ ရှိရုံမျှနဲ့-(ဆုတောင်းနေရုံမျှနဲ့) တော့ မိမိတို့ရဲ့ မျှော်မှန်းချက် မပြည့်စုံနိုင်ပါ၊ မျှော်မှန်းထားသည့်အတိုင်းစိတ်ပါလက်ပါ ကြိုးစားအားထုတ်မှသာ ပြည့်စုံနိုင်ပါတယ်။
အခုခေတ်မှာ အထက်တန်းရောက်နေသူတွေက အများအားဖြင့် အာသာဆန္ဒအားလျော်စွာ ကြိုးစားအားထုတ်လာကြသူတွေသာဖြစ်ကြပါတယ်၊ သို့ဖြစ်၍ ခဲခဲယဉ်းယဉ်း ရရှိလာတဲ့ မိမိတို့ရဲ့ လူ့ဘ၀ကို ခုရောနောင်ပါ အထက်တန်းရောက်အောင် ထက်သန်တဲ့ အာသာဆန္ဒကို အရင်းခံပြီ သမ္မာရဒ္ဓ ၀ီရိယဖြင့် ကိုယ်စီကိုယ်င မြှင့်တင်နိုင်ကြပါစေ။
[ဗုဒ္ဓအလိုတော်ကျ ကြီးပွားချမ်းသာရေး ကိုယ်ကျင့်မင်္ဂလာ၊ မြောင်းမြပဇ္ဇောတာရုံနှင့် မှော်ဘီ သာသနာ့ဝန်ဆောင်ဆရာတော် အရှင်ကုမာရ] စာအုပ်မှ ကူးယူဖော်ပြသည်။
No comments:
Post a Comment